Unha vintena de turoperadores nacionais e estranxeiros descobren Nigrán
Os turoperadores coñeceron onte os principais atractivos turísticos do municipio.
EE.UU, Rumanía, Suecia, Finlandia, Holanda, Alemania, Austria, Italia, Xapón, República de Corea e España, os países de procedencia dos visitantes.
Nigrán recibiu onte no Pazo de Cea, a visita dunha vintena de turoperadores nacionais e estranxeiros, que no contexto da feira internacional de turismo Turexpo Galicia, desprazáronse até esta zona das Rías Baixas para descubrir os encantos do concello miñorán.
Tres turoperadores norteamericanos, en representación do novo mundo; a comitiva asiática, cunha parella de xaponeses e un surcoreano; nove europeos procedentes de sete países diferentes -Finlandia, Alemania, Holanda, Italia, Austria Suecia e Romanía- e dous españois.
O percorrido
A primeira etapa da visita foi a contorna d'A Ramallosa, coa Foz do Miñor como emblema de natureza e a Ponte Románica, como mostra do patrimonio local. Ao finalizar, os axentes -acompañados por dous guías intérpretes- desprazáronse até o Pazo de Cea, onde foron recibidos polo alcalde de Nigrán, Alberto Valverde, a concelleira de Turismo, Cultura e Deporte, Liliana Silva, e Mariqui González, responsable do pazo.
Ademais de coñecer a arquitectura galega os convidadados puideron gozar dun ágape a cargo dos fogóns da cociña de Pepe Solla, para dirixirse novamente cara as zona de praias, o principal atractivo do municipio. O Templo Votivo do Mar, o Arco Visigótico, o porto de Panxón, o miradoiro de Monteferro e a praia de Patos coa súa ampla oferta de deportes náuticos completaron a ruta turística.
A beleza paisaxística, a contorna natural de Nigrán, as súas praias e a súa gastronomía foron os elementos máis encomiado por uns visitantes que afirmaron axudarán ao goberno local a situar Nigrán no mapa como destino turístico de calidade.
A feira
Segundo sinala o concello, o desenvolvemento da feira Turexpo Galicia contou cun "balance máis que positivo". “A caseta de Nigrán e Baiona foron unhas das máis concorridas da feira, especialmente os dous primeiros días, nos que primou un público profesional, repartindo máis dun milleiro de paquetes de merchandising entre os asistentes”, segundo explica a concelleira de Turismo, Liliana Silva. No último tramo da feira o protagonista foi o público xeral, principalmente galego, que asegurou coñecer Nigrán como destino turístico habitual.
Así mesmo, os municipios de Nigrán e Baiona sortearon entre máis de 600 persoas senllas noites de aloxamento no Pazo da Touza e no Parador de Baiona. Rafael García Araujo foi o gañador do paquete, que inclúe unha noite de aloxamento para dúas persoas en tempada baixa no Pazo da Touza.
