Os hostaleiros de Nigrán disporán desde hoxe dun novo sistema de recollida de vidro. Trátase dun contedor de 120 litros con dúas rodas, o cal unha vez cheo, descargaríase nuns contedores tipo iglú. Os mesmos dispoñen dun sistema de izado hidráulico do contedor, facilitando desta forma a separación en orixe e posterior xestión do residuo.
Responsables da empresa CESPA, acompañados polo alcalde de Nigrán, Alberto Valverde, e o concelleiro de Vías e Obras, José Álvarez, asistiron hoxe a unha demostración e explicación do sistema aos hostaleiros da zona de Panxón. O alcalde opinou que o novo sistema, "mellorará e, sobre todo, simplificará unha ardua tarefa que diariamente realizan os hostaleiros".