Finalmente non se poderá levar a cabo a Modificación Puntal das Normas Subsidiarias coas que a finais de 2010 o Pleno da corporación de Nigrán intentou adecuar o núcleo de Chandebrito a nova Lei de solo. O alcalde Alberto Valverde informou a Valminor.info que dende a Dirección Xeral de Urbanismo aconsellaron non iniciar un trámite paralelo ao que actualmente se sigue para a aprobación do Plan Xeral de Ordenamento Municipal (PXOM), xa que o mesmo non reportará beneficios nos prazos de resolución. Os esforzos por normalizar esta particular zona de Nigrán que maiormente medrou fóra das normas urbanísticas e sobre a que pesan decenas de ordes de derriba, deberá afrontarse agora na redacción actualmente en elaboración do PXOM.
A medida foi comunicada polo propio alcalde Alberto Valverde durante a xuntanza de traballo sobre o PXOM o pasado 3 de agosto. Consultado por Valminor.info, Valverde informou que se ben a modificación puntual votada no pleno de finais de 2010 non chegou nunca a tramitarse, despois de varias consultas cos técnicos e representantes da administración autonómica, chegouse á recomendación de concentrar a tarefa de normalización e regulación no PXOM que está a desenvolver o Concello. O rexedor foi advertido que unha modificación puntual tería serias dificultades "polo estilo e calibre da solicitada", e por riba "a solución óptima sempre estará no PXOM". A certeza de que a modificación puntual "non aforra prazos", levou a Valverde a tomar a resolución de encomendar á empresa redactora do PXOM a incluír no proxecto urbanístico a situación de Chandebrito.
Pola súa banda, o PSOE de Nigrán afirma que "Arnaiz Consultores", a empresa contratada para a redacción do PXOM, presentou a tramitación a devandita modificación puntual ante a Dirección Xeral de Urbanismo da Xunta de Galicia, e que o seu rexeitamento é unha decisión do PP. Nun comunicado público os socialistas agregan que " Dende o Partido Socialista sorprende que mentres o PP de Nigrán estivo na oposición apoiara, e mesmo acompañara aos colectivos de Chandebrito e ao anterior Concelleiro de Urbanismo a reunións coa Xunta de Galicia" para defender esta proposta e que " agora no goberno acepte a nova postura da Consellería de Medio Ambiente, Territorio e Infraestruturas e paralice un procedemento que soo ten o obxectivo de axudar a que Chandebrito adáptese a nova Lei do Solo e de este xeito facilite a regularización dunha moi complicada situación urbanística."
No devandito escrito asinado polo portavoz do PSOE Nigrán e ex concelleiro de Urbanismo Juan González, afírmase que" Os representantes da Asociación de Veciños
Pola súa banda, Valverde sinalou que o PSOE estaba ao tanto das dúbidas que a nivel dos técnicos municipais e da Xunta existían sobre a Modificación Puntual. Lembrou que das mesmas foron advertidos nunha reunión mantida en Santiago durante o goberno dos socialistas en Nigrán, á que Valverde concorreu acompañando ao representante da alcaldía. Situación da que tamén estiveran informados os veciños xa que se mantiveron reunións coas representación veciñais e da comunidade de montes.