O PSOE Nigrán denuncia a política cultural do alcalde popular Alberto Valverde.
O concelleiro Juan González denuncia que no calendario de actividades culturais para o mes de xullo publicitada polo goberno popular de Alberto Valverde, " so aparecen as concertadas polo goberno socialista a través de Camiños da Cultura" e mais as "organizadas polas comisión de festas de cada parroquia facéndoas súas o Partido Popular". O socialista atribúe a xestión do programa Camiños da Cultura ao mandato de Efrén Juanes ante a Axencia Galega das Industrias Culturais (Agadic) da Consellería de Cultura e Turismo da Xunta de Galicia.
A través dun comunicado de prensa os socialistas afirman que a cultura "paralízase totalmente co Partido Popular de Nigrán, nin concertos, nin charlas, nin rutas guiadas, nin bandas de música na Ramallosa, nin por en valor o noso patrimonio, ni un grupo nin un artista de Nigrán no calendario cultural, nin nada que supoña potenciar as actividades culturais en Nigrán."
O PSOE entende que o concello " debe seguir sendo un referente en actividades culturais diversas e en todas as parroquias como foi durante o verán 2010". Por iso a través do devandito comunicado esixe ao alcalde Alberto Valverde e a súa concelleira de Cultura e Turismo Liliana Silva que "adiquen máis tempo ao Concello e aos seus veciños e veciñas que dende o primeiro día teñen abandonado, que xestionen os moitos recursos que ten este concello e que o fagan tamén diante de outras administracións".
