UCN presenta moción para destituír dos seus cargos ao concelleiro Cándido Costas Fernández.
Unión Centrista de Nigrán (UCN) ingresou hoxe ao rexistro do Concello unha moción na que rexeita a permanencia na corporación do concelleiro socialista de Vías e Obras Cándido Costas Fernández ademais de solicitarlle a renuncia voluntaria da súa acta de concelleiro electo. O portavoz de UCN Antonio Fernández Comesaña, fundamenta a moción nun intenso informe onde cita as supostas continuas violacións do concelleiro socialista, das normativas urbanísticas vixentes e o incumprimento das sentenzas xudiciais relacionadas a unha vivenda unifamiliar da súa propiedade e actos de desorde público no concello de Nigrán. A iniciativa de UCN tamén insta ao alcalde Efrén Juanes a que proceda á destitución de Costas Fernández de tódolos cargos de concelleiro delegado, en caso de que este non renuncie voluntariamente a eles. A iniciativa en caso de ser aprobada déixalle unha semana de prazo a Efrén Juanes para dar cumprimento á execución da mesma. Pola súa banda, o portavoz socialista Juan González afirmou que unha vez máis o concelleiro Fernández Comesaña intenta atopar "un oco na política de Nigrán a través deste tipo de cousas". González manifestou o total rexeitamento dos fundamentos así como da moción presentada pola UCN, e quitou trascendencia ás acusacións de Fernández Comesaña por tratarse dunha persoa que no "ámbito da política esta moi desprestixiada".
Antonio Fernández Comesaña, afirma que o seu interese é "denunciar a hipocresía e dobre moral que practica o PSOE de Nigrán, vendo a palla no ollo alleo e non a viga no propio, ao manter na corporación un concelleiro sobre o que pesa unha sentenza por danos á casa consistorial, mobiliario urbano, vehículos policiais, así como alteración da orde pública etc, e imputación dun presunto delito de corrupción urbanística e contra a ordenación do territorio." O líder de UCN dixo que instará á dirección provincial e galega do PSOE "e especialmente ao seu secretario xeral Pachi Vazquez, aplicando en Nigrán o que veñen pregoando en relación a concelleiros condenados por sentenza firme, co fin de rexenerar a vida pública, por hixiene e limpeza democrática, teñen en Nigrán a oportunidade de predicar co exemplo, pola contra a súa mensaxe non será crible ante a cidadanía."
