Nigrán acumula 350 toneladas de lixo tras oito días de folga indefinida
«Aquí dun xeito ou doutro se ten que implicar o concello», argumentou Fernández, quen agregou que a institución pública ou ben asume a diferenza que se lle está pedindo a Cespa ou se lle terá que rescindir o contrato.
A folga indefinida comezou agora fai oito días. Cada día que pasa déixanse de recoller en Nigrán entre 40 e 50 toneladas. Os fortes fedores son xa insoportables non só para os veciños da zona, senón tamén para a poboación turista desta época estival.
O comité de empresa demanda un incremento salarial que equipare o que cobra ao ano un peón de limpeza municipal (17.000 euros) ao que gaña un peón de Cespa (14.000 euros).
A primeira toma de contacto entre Cespa e o comité de empresa produciuse onte nas instalacións de CIG en Vigo, e logo de dúas horas non conseguiron aproximar posicións.
Cespa ofreceu aos seus empregados un incremento salarial do IPC máis 1 punto, así como unha cuarta paga, o que representa a metade do que reivindican os traballadores, polo que non o aceptaron.
