Esquerda Unida esixe a retirada de pintadas da Falange que se amosan en varios edificios de Gondomar.
- Anterior
- 1 of 2
- Seguinte
Esquerda Unida de Gondomar presentará unha nota ante o Concello solicitando a limpeza das fachadas de edificios céntricos con pintadas da Falange. A agrupación entende que as mesmas "danan a sensibilidade de moitos dos cidadáns que ata o de agora gardamos silencio ante os feitos acontecidos".
O seu portavoz, Josué Villar , acusa ao goberno bipartito (PP-CDL) pola pasividade ante estes feitos que dende un tempo atrás están a acontecer en varios edificios céntricos de Gondomar. "As pintadas fan referencia á organización fascista de Falange", aclara o escrito que entregará no Concello. Agrega que pese a que Falange é "unha organización política legalizada, a súa historia deixa claro os obxectivos de carácter fascistas que persegue esta agrupación. Para nós, as pintadas constitúen ademais unha provocación moral a toda a cidadanía".
Falange, que presentou unha lista de candidatos nas municipais de Gondomar, en 2011, non ten actividade pública coñecida na actualidade no municipio. Nembargante, nos últimos tempos están a aparecer pintadas asinadas pola mesma, contrarias á descentralización do goberno de España en autonomías, así como esixindo máis educación física para combater a droga.
No escrito que presentará EU ao Concello de Gondomar chama a "non repetir erros do pasado" e "afastar ós partidarios do fascismo da nosa realidade. En España, a diferenza de Alemaña, país no cal lévase dende a caída do nazismo traballando para acabar co xerme do fascismo, aínda nos queda moito por facer."
