A Fundación Menela desenvolverá en Nigrán un programa de educación permanente destinado a persoas adultas con autismo. "Unha cuestión básica e fundamental ao longo de todo o seu ciclo vital", segundo explicou Cipriano Jiménez, director xeral da fundación durante a presentación do proxecto este venres no Salón de Plenos de Nigrán.
Destacouse a posta en marcha de programas estimuladores "para o enriquecemento" das súas habilidades sociais, autonomía persoal e preparación para a realización daquelas tarefas máis adecuadas atendendo ás súas posibilidades, "polo que o proceso educativo non debe acabar en ningún caso nas escolas de educación especial, senón prolongarse ao longo de toda a súa vida", apuntou o director de Menela.

Na tarde deste venres 12 de xuño chegou a formarse por uns minutos un pequeno tornado no barrio de Fontes en Baiona. O fenómeno cada vez aparece de xeito máis frecuente no Val Miñor nos últimos anos, aínda que sempre no mar. É a primeira vez que se mira a súa formación dende terra. O vídeo capta o fenómeno meteorolóxico visto dende a Praia de Santa Marta sobre ás 21:20 horas.

Unha reestrutura de persoal e as súas áreas de distribución deixa aos carteiros da bisbarra nunha relación de 1 cada 2000 habitantes de media. O dobre do recomendado para unha cobertura diaria e axeitada, segundo fontes sindicais. Por riba, dúas zonas rurais en Baiona e Oia antigamente cubertas cun carteiro cada unha, agora foron incluídas nos responsables doutras áreas. A maiores o ente Correos non prevé substituír as ausencias de persoal por vacacións ou baixas durante o verán con novas contratacións. Neste contexto, o persoal do centro de distribución da Ramallosa sairá este luns á rúa para manifestar o seu rexeitamento ao novo plan da empresa para a zona. A protesta non afectará as tarefas ao público pois desenvolveranse no espazo libre que goza o persoal ás 9 horas . Os traballadores percorrerán o mercado de Sabarís.

Un incendio nunha nave de conxelados situada na Rúa Jacinto Benavente, en Vigo, obrigou ás forzas da orde a desaloxar ós operarios que ocupaban os seus postos de traballo na conserveira Albo.

Afortunadamente, non houbo que lamentar danos persoais, salvo, un membro do equipo de extinción que tivo que ser atendido polos servizos sanitarios, ao sufrir unha sobrecarga calorífica mentres sufocaba o lume.