- Anterior
- 1 of 2
- Seguinte
Os cativos do CEIP da Cruz de Camos viviron unha das xornadas educativas máis divertidas do ano. Pepe Carreiro, creador dos populares "Bolechas" visitou o centro e debuxou con eles este mércores 6 de xuño. Os rapaces viron como sobre o papel aparecían primeiro a lapis e logo con rotulador distintos personaxes das historias infantís. A actividade foi organizada polo equipo docente no marco do Proxecto de Normalización Lingüística do centro.
Pepe Carreiro faloulles do seu interese polo debuxe dende pequeno e de como decidiu posteriormente establecelo como o seu modo de vida, como o seu traballo. Explicoulles aos nenos como se debuxa, nomeadamente o uso do lapis primeiro - a modo de borrador- logo o rotulador, e finalmente o uso do ordenador.
Na dinámica, fíxolles distintos debuxos e evidentemente a estrela foron os "Bolechas". Carreiro ía facendo os debuxos modificándolles cousas sobre a marcha, os nenos rían e interviñan na construción dos personaxes.
A visita de Carreiro permitiu desenvolver con éxito a unidade temática "A historia da lingua galega", da que é autor dos libros da bibliografía básica, Historia da Lingua Galega e Historia de Galicia. Outros dos aspectos máis salientables da xornada estivo polas interesantes preguntas feitas polos alumnos ao visitante, segundo comentaron os docentes.
