Venres de celebracións e xogos no marco das Letras Galegas dos alumnos do ensino infantil e primario.
A vila de Gondomar será sede, este venres 25 de maio, do II Encontro de Xogos Populares e Tradicionais do Val Miñor, e a entrega de premios do II Concurso Cartel e Lema, actividades que organiza a Coordinadora de Equipos de Normalización Lingüística dos centros de ensino infantil e primario do Val Miñor.
No marco do mes das Letras Galegas 2012, 360 nenas e nenos miñoráns acompañados do profesorado, participarán desta segunda edición de xogos populares e tradicionais. Nomeadamente, alumnos do carto grado de ensino primario desenvolverán actividades lúdicas no Campo das Cercas de Gondomar, entre as 10 ás 13 horas.
Na mesma xornada, sobre as 20 horas, farase entrega dos premios e agasallos aos estudantes que participaron do II Concurso "Cartel e Lema", no Auditorio Municipal de Gondomar, Lois Tobío. Actividade que tivo unha fase previa de exposición no Centro Comercial d'A Ramallosa, entre o 10 e o 20 deste mes.
