-Gondomar xunto con outros 44 concellos de Pontevedra asinan un novo convenio coa Deputación para manter o programa de teleasistencia tralo retiro do Imserso o pasado mes denovembro.
-As solicitudes de altas deberán ser tramitadas nas dependencias da Concellería de Benestar Social localizadas na Casa da Cultura de Gondomar.
Os servizos sociais do Concello de Gondomar retoman a solicitudes de alta para o programa de Teleasistencia para persoas maiores e dependentes que se atopan soas ou pasan a maior parte do día sen compañía. Se ben o servizo sempre estivo activo, tralo anuncio do Imserso do seu retiro do programa para o 2013, dende novembro pasado non se rexistraban novas altas para á espera dunha solución financeira que permitira o mantemento do programa.
A mesma quedou acordada o pasado xoves 23, coa sinatura dun convenio no que os concellos de Pontevedra con menos de 20 mil habitantes asumirán o 66% do custe e a Deputación o 34% restante. Nese senso o vindeiro venres a Deputación anuncia que dará a coñecer o nome da empresa adxudicataria do servizo, actualmente en proceso de contratación.
Segundo as bases da licitación en curso, o custe unitario de cada titular do servizo roldaría os 19 € ao mes, sendo o copago dun 50% para persoas que utilizan unidades de control remoto adicional, e dun 40% para o resto.
