O tradicional "Concerto de Outono" que organiza a Coral Polifónica Novos Aires de Nigrán, terá este ano unha faciana solidaria. O colectivo decidiu para esta edición fixar unha entrada simbólica a través da achega de alimentos non perecedoiros ou perecedoiros de longa duración, que serán destinados ao banco de alimentos de Cáritas Nigrán. O festival coral terá lugar este sábado 10 de novembro ás 20:30 horas no Salón de Actos do Concello de Nigrán.
O público asistente poderá gozar tamén da participación do grupo de cordas Son do Val, e do mestre Afasto Amoedo ao piano.
