O número de habitantes de Galicia afiliados á Seguridade Social acadou a cifra de 916.759 a novembro de 2013. O que representa un descenso de 18.683 afiliacións co respecto ao mesmo mes en 2012, segundo os resultados dados a coñecer polo Instituto Galego de Estatística (IGE), no seu "Informe sobre afiliacións á Seguridade Social". A caída foi do 2% superior á diminución do 1,44% rexistrada no conxunto de España.
Só entre os meses de outubro e novembro deste ano tiveron lugar 4.573 baixas ao sistema, segundo o mesmo informe.
Os datos de afiliación arroxan números negativos nas catro provincias galegas.
O número medio de afiliacións á Seguridade Social descendeu con respecto ao mesmo mes do ano pasado nas catro provincias galegas. Lugo é a provincia que sufre o descenso interanual máis forte nas afiliacións cunha taxa de variación do -3,06%, o que supón unha perda de 3.600 afiliacións, seguida de Pontevedra cunha taxa interanual do -2,06% e 6.579 afiliacións menos.
As provincias con menor descenso relativo son Ourense e A Coruña, con caídas do 1,42% e do 1,77% respectivamente. En termos absolutos o descenso foi de 1.416 afiliacións menos en Ourense e 7.088 na Coruña.
No que respecta ás afiliacións medias deste mes de novembro con respecto ás do mes precedente, o descenso en Galicia do 0,5% é consecuencia de que todas as provincias
amosan un dato negativo, destacando Pontevedra con 2.824 afiliacións menos, que supoñen unha taxa de variación do -0,9%.
