O Xornal do Val Miñor. Baiona, Nigrán, Gondomar

O sábado 15 de outubro, ás 12.30 h., procederase á inauguración do Monumento-homenaxe aos nove veciños do Val Miñor asasinados na coñecida como “Volta dos Nove” .

O monumento é un bosque-escultura realizado por Fernando Casás.
A Comisión organizadora chama aos veciños e veciñas do Val Miñor a participar no acto inaugural.

Un bosque de 45 loureiros, a árbore dos heroes, o tronco dunha árbore, realizada en bronce, cortado, truncado como a vida dos nove veciños asasinados, hai 69 anos, na volta da estrada de Baiona á Guarda, coñecida dende aquela como a “Volta dos Nove”. Xunto cunha lousa de granito na que van inscritos os nomes dos mortos así como unha lembranza das nove cruces
na area que durante décadas lembraron en silencio este crime, forman os elementos máis significativos deste proxecto deseñado polo escultor nacido en Gondomar aínda que formado no Brasil e dende hai anos veciño de novo do
Val Miñor.

Culmina así un proxecto que naceu hai un ano nun acto público que tivo lugar na Biblioteca de Baiona no que se constituíu unha comisión para promover este monumento-homenaxe. A obra realizase por subscrición popular aínda que tanto o escultor como as demais persoas que traballan no proxecto fano desinteresadamente. O elevado custe que acadou finalmente o proxecto obrigará á comisión a continuar coa recadación de fondos para sufragalos e no caso de que houbese excedentes poder realizar no 2006, aos setenta anos dos feitos, outras actividades de divulgación daqueles tráxicos meses para o Val Miñor e para toda Galicia.

O acto inaugural celebrarase o mesmo 15 de outubro, sábado, ás 12.30 h. 
Na mesma Volta dos Nove. Neste acto estarán presentes familiares dos nove asasinados. A comisión organizadora cursou convite ao Goberno da Xunta de Galicia, a todos e cada un dos deputados e deputadas do Parlamento de Galicia, aos tres alcaldes do Val Miñor así como a todos os concelleiros e concelleiras de Nigrán, Baiona e Gondomar. Así mesmo cursouse invitación a moitas persoas relacionadas co mundo da cultura. Así mesmo a comisión organizadora quere convidar a veciños e veciñas do Val Miñor a participar neste acto homenaxe aos nove miñoranos asasinados o 15 de outubro de 1936.


DONATIVO INGRESO na conta de Caixanova  2080 0528  66 0000005960
TARXETA ou conta PAYPAL se queres facer o donativo por internet na dirección 
https://www.paypal.es/affil/pal= Este enderezo de correo-e está a ser protexido de robots spamers, precisas activar o JavaScript para velo