O avogado e escritor Xosé Luís Franco Grande (Tomiño, 1936) presentará o seu recente traballo editorial Outra política para outros tempos (Editorial Galaxia) o vindeiro xoves 16 de xaneiro, ás 20:30 horas na Aula de Cultura Ponte de Rosas (Avda. da Feira, 10 baixo, Gondomar). O acto contará coa presentación de Miguel Barros Puente, mestre, licenciado e doutor en ciencias políticas.
O libro: Outra política para outros tempos
A proposta de Franco Grande neste libro é considerar con outro punto de vista as cuestións da política galega aínda abertas. Nese contexto, para o autor o federalismo non sería só solución, senón unha maneira de organizar o social, unha cultura.
Con este libro preténdese que o lector pense sobre o desenvolvemento desa realidade que é Galicia, vista desde Europa e tendo presentes as correntes de pensamento federalista que xurdiron despois da Segunda Guerra Mundial, cando quebran os estados-nación. Federalismo para Galicia tendo á vista o federalismo que para Europa pensaron os europeístas, e que para o autor "xa é unha necesidade urxente".
O autor.
Nace en Tebra (Tomiño) no ano 1936, estudou Dereito na Universidade de Santiago de Compostela e exerceu en Vigo a profesión de avogado. En 1978 foi nomeado académico de número na Real Academia Galega e leu o seu discurso de ingreso en 1998. Foi nomeado fillo predilecto do concello de Tomiño en 2011.
É autor do xa histórico Diccionario Galego-Castelán (1968) e do Vocabulario Galego-Castelán (1972). A súa obra como poeta inclúe títulos como Entre o si e o non (1967) e O tempo á espreita, que reuniría posteriormente no volume Herdo de memoria e tempo (1987). Colabora decote nos xornais A Nosa Terra e La Voz de Galicia.