Ao longo da mañá do vindeiro mércores 28 de marzo, os cativos de sete colexios do Val Miñor asistirán a dous espectáculos relacionados coa animación á lectura. No auditorio Lois Tobío representarase a obra O rapto da bibliotecaria, a cargo do grupo da Escola Municipal de Teatro do Concello de Vigo. Así como a unha sesión de contacontos, a realizarse na Biblioteca Municipal polo equipo de contadores de Espazo Lectura.
A actividade, na que participarán próximo a 350 cativos principalmente do concello de Gondomar, desenvolverase en diferentes quenda e horarios. A organización do evento estará a cargo da Asociación Espazo Lectura co apoio da Concellería de Cultura de Gondomar.
Esta actividade cultural estará dedicada aos centros de ensino da zona que son socios-protectores de Espazo Lectura e que colaboran ao longo de todo ano na difusión das actividades de fomento da lectura que organiza a asociación. Trátase dos CEIP, Souto-Donas, Serra-Vincios, Chano Piñeiro, Neira Vilas-Peitieiros, Carlos Casáres-Vilariño, A Cruz-Camos e o CRA Antía Cal.
O rapto da Bibliotecaria.
A peza, que combina o teatro de actor e os monicreques, está baseada na novela homónima de Margaret Mahy e narra a historia da señora Liboreiro, a bibliotecaria dunha pequena cidade, secuestrada por un grupo de bandidos que pretenden conseguir un cuantioso rescate por parte do concello. Divertidas e disparatadas aventuras mestúranse coa vida nunha biblioteca como pano de fondo.
Contacontos na Biblioteca Municipal.
Ademais, os nenos e nenas asistirán tamén a unha sesión de contacontos, realizada na Biblioteca Municipal polo equipo de contadores de Espazo Lectura. A sesión, que terá como título Cociña de contos, inclúe as historias de Sopa de nada, A sopa queima e Sopa de soños.
.
