A Axencia Galega das Industrias Culturais (Agadic) da Consellería de Cultura e Turismo estrea nova páxina web que, mantendo o seu enderezo www.agadic.info, actualiza o seu deseño e estrutura para dar cabida a novas seccións multimedia, ás redes sociais e aos contidos de actualidade xerados polo propio sector.
Así, xunto cos apartados de novas, carteleira e avisos relacionados directamente coa actividade da Agadic, incorpórase agora unha sección que, baixo o título Olladas, recolle noticias e eventos protagonizados polos propios profesionais das industrias culturais e clasificados por sectores: audiovisual, escena, música, etc.
Canle TV
Esta nova páxina está preparada, así mesmo, para albergar os contidos audiovisuais anteriormente aloxados na plataforma web flocos.tv, tal e como fora anunciado polo director da Agadic, Juan Carlos F. Fasero. Nestes momentos, estanse a desenvolver os axustes técnicos precisos para a visualización deste catálogo audiovisual directamente dende a web da Agadic, a través dunha nova sección denominada Canle TV.
A web da Agadic incorpora, ademais, dous novos apartados multimedia –Galería e Vídeos–, así como os vínculos ás redes sociais ás que a entidade da Consellería de Cultura se incorporou recentemente a través dunha canle propia en YouTube e unha páxina en Facebook.
Tamén se reestruturou e actualizou a información de carácter institucional e de servizo ao sector, que agora conta cun acceso directo ao apartado de Axudas, a través do que se informa puntualmente do estado das distintas convocatorias de subvencións da Agadic ao sector (industrias culturais e audiovisual). Programacións, proxección exterior, centros de produción, premios, publicación e prensa son outros dos apartados informativos desta web, desde a que se facilita o acceso, asemade, á intranet galescena.info como ferramenta de traballo para as compañías e programadores dos espazos adscritos ás redes e circuítos promovidos pola Agadic.