Este venres 23 de maio ás 20:30 horas terá lugar a estrea da curta documental AUGA, TERRA, AIRE... (A BOLSA), dirixida por Pablo Casal e realizada por Ollomol Audiovisual. O acto contará coa presenza de Pablo Banga (fotografía e edición) e Pablo Casal (guión e dirección) e será presentado por Pedro Telmo Rodríguez, publicista e director do Valminor.info.
A curta percorre espazos senlleiros de Gondomar, especialmente os vencellados á Serra do Galiñeiro, espazo no que Pablo Casal desenvolve múltiples actividades na defensa da súa conservación. Segundo os seus realizadores, durante 13 minutos AUGA, TERRA, AIRE, ... (A BOLSA) convidará ao espectador a reflexionar sobre o impacto que actual sociedade de consumo, e especialmente a tendencia "só un uso" están a provocar na nosa contorna.
