O vindeiro venres 19 de abril ás 20:30 horas terá lugar en Gondomar a presentación do libro A noite branca (Edicións Xerais), na librería Libraida (Rúa Rosalía de Castro Nº 13). O acto, aberto a todo público, contará coa presenza do escritor Francisco X. Fernández Naval –autor do libro-, e a presentación estará a cargo da profesora do IES Escolas Proval, Rosa Pascual.
A novela A noite branca, xira arredor da experiencia dos voluntarios galegos na División Azul. Unha unidade de voluntarios españois que serviu entre 1941 e 1943 no exército alemán durante a Segunda Guerra Mundial, no intento de invasión á entón Unión Soviética.
O seu protagonista, Marcos, sente a necesidade de coñecer e contar unha parte esquecida do seu pasado familiar cando descobre varias fotografías e un feixe de cartas escritas por un voluntario da División Azul, enviadas desde a fronte rusa en 1941, e atopadas no interior dunha caixa de marmelo.
O autor, Francisco X. Fernández Naval (1956) é poeta e narrador.Foi un dos pioneiros da abordaxe na nosa lingua do tema da guerra civil cunha novela, O bosque das antas, que foi Premio Xerais en 1988.