Baiona estivo presente na presentación da campaña "Rías Baixas, Ricas por Natureza" en Ponferrada.
ANFACO e o Consello Regulador da D.O. Rías Baixas, en colaboración con Turismo Rías Baixas da Deputación de Pontevedra e Asociacións Turísticas da provincia, presentaron por segundo ano consecutivo a campaña "Rías Baixas, Ricas por Natureza" en Ponferrada, na provincia de León (Castilla y León). O acto celebrouse o xoves 18 de marzo no Hotel Ponferrada Plaza e estivo presidido polo Alcalde de Baiona e Deputado Provincial, Jesús Vázquez Almuiña, o responsable de estratexia e desenvolvemento de ANFACO-CECOPESCA, José Carlos Castro, Rosa Martínez en representación do Consello Regulador e Ventura Rodríguez en representación das Asociacións Turísticas, arroupados polo Alcalde de Ponferrada, Carlos López Riesco.
Tamén estivo presente Ezequiel Simóns, presidente da Asociación de Comerciantes e Empresarios de Baiona, Aceba, o cal apoiado por persoal técnico do departamento de Turismo de Baiona, entregou máis dun centenar de folletos e artigos representativos da zona aos diferentes colectivos e axencias de viaxes asistentes. A campaña ten como obxectivo fundamental consolidar a marca "Rías Baixas" como un destino turístico de calidade e de proximidade.
Entre as diferentes actuacións levadas a cabo nesta presentación destacouse o” workshop” no que as asociacións turísticas da provincia, deron a coñecer a variedade de opcións e destinos turísticos, que ofrece esta zona de Pontevedra. Tras a presentación oficial da campaña, o público asistente tivo a oportunidade de comprobar as calidades dos produtos descritos, nunha degustación de 7 receitas gastrónomas, elaboradas a partir de conservas de peixes e mariscos e de 12 marcas de viños, con D.O. Rías Baixas.
A campaña que realizou a súa quinta escala en Ponferrada, percorrerá ata o próximo 14 de abril, cinco cidades máis do noroeste peninsular, incluído o norte de Portugal. O calendario da campaña "Rías Baixas, Ricas por Natureza" seguirá de promoción en Oviedo (24 Marzo), Santander (31 Marzo), Madrid (7 Abril), Porto (11 Abril) e Vigo (14 Abril).
