Lois Tobío ten unha especial vinculación con Gondomar xa que dedicou moitos anos da súa vida ao estudo da figura de don Diego Sarmiento de Acuña. Os seus traballos viron a luz nalgunhas obras fundamentais para o coñecemento da época e da personalidade do 1º Conde de Gondomar, entre as que compre salientar Gondomar y su triunfo sobre Raleigh e Gondomar y los católicos ingleses. Tobío mereceu xa dous actos de agradecemento por parte do concello de Gondomar. O primeiro, xuño de 2001, con motivo do seu 95 aniversario, cando se inaugurou oficialmente o Auditorio Municipal Lois Tobío, segundo acordo anterior do pleno do concello. Naquel acto ademais da súa filla Constanza estiveran presentes amigos e intelectuais como Isaac Díaz Pardo, Francisco Fernández del Riego ou o sempre lembrado Carlos Casares.
Con posterioridade e tras a súa morte, 13 de marzo de 2003, o pleno do concello de Gondomar acordou por unanimidade, a proposta do Instituto de Estudos Miñoranos, nomear a don Lois Tobío fillo adoptivo de Gondomar a título póstumo. O pleno de honores tivo lugar o 26 de novembro de 2005. De novo acudiu a Gondomar a súa filla Constanza, mentres que o historiador Ramón Villares interveu como mantedor do mesmo. Daquela virá a luz o seu traballo inédito sobre o Conde de Gondomar, Dous embaixadores: Digby e Gondomar.
O acto do próximo martes, ao que asistiran membros do Instituto de Estudos Miñoranos e dos grupos municipais do concello de Gondomar, está organizado pola Consellería de Cultura da Xunta de Galicia, as máis importantes institucións culturais galegas, así como os concellos de Viveiro, Santiago e Gondomar. No mesmo farase unha lectura de textos de Lois Tobío e intervirán Isaac Díaz pardo, Constanza Tobío e a conselleira Ánxela Bugallo. Na lembranza dos anos de Tobío como secretario da embaixada española en Bulgaria, un grupo de cámara deste país porá o peche ao homenaxe.