As obras de ampliación do porto pesqueiro de Baiona sacaron á luz un xacemento arqueolóxico composto por miles de pezas que datan desde a época romana ata cubrir toda a historia marítima do municipio. Trátase dun dos achados máis interesantes dos últimos anos debido á gran cantidade de materiais que están sendo descubertos e polo seu excelente estado de conservación. A investigación subacuática foi contratada pola empresa que se encarga de executar o proxecto para a prolongación do dique pesqueiro en 70 metros, cumprindo así un dos requisitos que foran estipulados pola Xunta no prego de condicións. Esta actuación é unha vella reivindicación do colectivo de pescadores.