Os dous volumes veñen de ser editados pola Fundación Barrié de la Maza dentro da Biblioteca Filolóxica Galega do Instituto da Lingua Galega.
No mesmo intervirán os dous autores, filólogos, profesores e veciños do Val Miñor que serán presentados polo director do Instituto de Estudos Miñoranos, Carlos Méixome. A obra de Xulián Maure Para unha escriptoloxía do galego. Edición e estudo escriptolóxico do Tombo do Hospital dos Pobres de Tui (1436-1490), ademais de ser un estudo da grafía galega do século XV, é unha edición rigorosa da colección de documentos – foros, doazóns, vendas, sentenzas, apeos, mandas e cumprimentos- escritos entre 1432 e 1490, que se gardan nun pequeno tombo do Hospital dos Pobres de Tui, no Arquivo Diocesano desta cidade. Estes documentos constitúen unha fonte importante para a historia de Galicia e da súa lingua natural.
Por outra parte, esta obra é o primeiro estudo que se fai da lingua escrita tendo en conta os traballos dos lingüístas centroeuropeos Louis Remacle, Theodor Gossen e Hans Goebl, fundadores da disciplina escriptolóxica. As diferencia gráficas que se toparon entre os cinco notarios que actúan nestes documentos de Tui, descobren a tendencia da escrita galega cara a unha mellor correspondencia coa lingua oral e unha superación de criterios arcaicos.
O libro de Gonzalo Navaza Blanco, Fitotoponimia galega recolle a súa tese de doutoramento titulada “Contribución ó estudo da toponimia da Galicia meridional. A Fitotoponimia”, realizada baixo a dirección do profesor Antón Santamarina e defendida en 1998 na Facultade de Filoloxía da Universidade de Santiago e que mereceu a cualificación de Sobresaliente cum laude por parte do tribunal.
Na tese doutoral recollida no libro realízase un exame da toponimia galega relativa á flora, á terminoloxía botánica e a outros campos semánticos próximos. Partindo do estudo dos topónimos da Galicia meridional, pero con referencias á toponimia de toda Galicia e doutras áreas peninsulares. Este volume ocúpase do estudo etimolóxico, semántico e morfolóxico de cerca de 8000 nomes de lugar. A análise de cada unha das formas vai acompañada de atestacións medievais que corroboran a etimoloxía proposta e dan información sobre as primeiras documentacións e a historia dos topónimos.