O próximo venres, 1 de decembro, terá lugar a segunda das TERTULIAS DO IEM deste curso 2006-07. Como é costume será ás 20:30 h. no Pazo da Escola. Nesta ocasión estará con nós a pedagoga Antía Cal que exerceu durante anos o seu maxisterio no Colexio, do que foi fundadora e directora, Rosalía de Castro de Vigo.
A súa profunda pegada como pedagoga fixo que o Colexio Rural Agrupado de Gondomar decidise, no seu momento, homenaxeala poñéndolle o seu nome. Na actualidade segue con paixón o mundo educativo e sobre os retos actuais do ensino falará na Tertulia do IEM. A nosa convidade será presentada polo científico do Instituto de Investigación Mariñas do Centro Superior de Investigacións Científicas, miñorán e ex alumno do Rosalía de Castro, Xosé Pintado Valverde.
Ao remate da TERTULIA, aberta ao público, terá lugar unha cea coa nosa convidada. Para asistir á mesma, e tendo en conta que as prazas son limitadas, pregamos fagan a reserva no 680 644 490.
Antía Cal
Antía Cal naceu na Habana no ano 1923, volvendo a Galicia de nena. Licenciouse en Xeografía e Historia na Facultade de Letras de Compostela no ano 1945.
A súa vocación pola pedagoxía, impulsada polo seu home, Antón Beiras García, e influída polas correntes pedagóxicas que coñeceu viaxando con el por Europa, levárona a crear no ano 1962 a Escola Rosalía Castro de Vigo.
Fronte a escola daquela época, o Rosalía foi pioneiro en moitos aspectos: unha escola laica, mixta, bilingüe (co inglés como segundo idioma dende o parvulario), na que primaba o respecto ó alumno, como suxeito de dereitos, e cunha didáctica activa na que mestres, pais e alumnos participaban do proxecto pedagóxico. Unha escola inserida no entorno social, comprometida ca reivindicación da realidade e a cultura galega, e en contacto estreito cos novos movementos de renovación pedagóxica, coma a Escola de Mestres Rosa Sensat de Cataluña, liderada por Marta Mata.
Antía Cal segue a ser hoxe unha das voces mais autorizadas que temos en Galicia no ámbito da pedagoxía, e dese tema falará con nós.