A plataforma Gondomar Vive tampouco se quedou atrás no que se refire a mobilizacións en contra do Vigo Íntegra. Por esta razón convocou unha manifestación para o sábado ás once e media da mañá, que sairá da chaira do pavillón municipal e percorrerá as rúas de Gondomar ata chegar á praza do concello. Aí lerán un comunicado e entregarán no rexistro da casa consistorial todas as alegacións recolleitas.
A directiva da plataforma invita a participar a todos os veciños, tanto se son afectados directos coma se non, porque o problema é de todos xa que os viarios que contempla o plan, que son a circunvalación que conecta a saída da autoestrada co centro do municipio e a vía de alta capacidade que vai ata Tomiño, destruirán a comarca e fomentarán divisións territoriais entre uns barrios e outros, segundo denuncian.
O goberno municipal de Nigrán apoia o proxecto do "carril bici" e a senda peatonal pola estrada da vía, pero traballa en propostas para melloralo. Así, o departamento de Urbanismo, que dirixe o socialista Juan González, prepara polo menos dúas alegacións para evitar puntos "negros" que, a xuízo do equipo de Efrén Juanes deben modificarse.
A polémica polo trazado proposto pola Xunta para a futura autovía que unirá Tui e A Guarda segue xerando polémica no municipio pontevedrés de Tomiño. Onte o Concello tivo que instalar unha pantalla xigante para que os veciños puidesen seguir o pleno no que a corporación esixiu un novo trazado para a autovía pero hoxe un grupo duns douscentos veciños continuaron coas protestas e encadeouse ás portas do Consistorio.
