Domingo, 12 Jul. 2020

Actualizado12:21:09 AM GMT

Estás en Gondomar Gondomar estuda solicitar un informe de impacto ambiental polo parque eólico na Serra do Galiñeiro.

Gondomar estuda solicitar un informe de impacto ambiental polo parque eólico na Serra do Galiñeiro.

Correo-e Imprimir PDF
galieiro ao_fondo


O Concello de Gondomar recibiu o documento de inicio do proxecto sectorial do polígono eólico que enviara a Consellería de Medio Ambiente, Territorio e Infraestruturas ás administracións locais, como parte da tramitación da concesión. Nesa achega, Medio Ambiente interroga á administración local sobre a necesidade de elaborar un informe de impacto ambiental, nomeadamente sobre a parroquia de Vincios, no caso de Gondomar, co fin de ampliar a información sobre os efectos do proxecto na zona. A devandita consulta atópase a estudo do arquitecto municipal e de momento, o rexedor Fernando Guitián non quixo adiantar a decisión do seu goberno ata obter a opinión do técnico.

Nembargante, Guitián confirmou a súa vontade política de soster o rexeitamento da instalación do parque eólico na Serra do Galiñeiro, efectuado polo pleno da corporación en xaneiro deste ano. Nese senso, informou que o resolto naquel pleno extraordinario coincide totalmente coa súa opinión sobre esa iniciativa.

O rexedor escusou pronunciarse por "coherencia" co modelo de xestión que está a impulsar no seu mandato. As declaracións foron feitas durante un encontro cos xornalistas da bisbarra mantido este martes, onde Guitián salientou a súa firme decisión de lograr un funcionamento axeitado entre os funcionarios e técnicos municipais cos responsables políticos do Concello.

A Plataforma pola defensa da Serra do Galiñeiro quere que os Concellos soliciten o informe.

Por outra banda as distintas asociacións que compón o movemento Pola protección da Serra do Galiñeiro declaráronse "persoas xurídicas interesadas no procedemento" a fin de poder presentar alegacións no futuro estudo de impacto ambiental.

Os concellos de Vigo e Gondomar, afectados por este proxecto, xa se pronunciaron en contra nos seus respectivos plenos, aínda que tamén hai territorio afectado nos municipios de Porriño e Mos.

Nesa liña, a plataforma xa presentou sendas iniciativas a estes concellos para que os mesmos soliciten á Xunta que realice o devandito estudo de impacto ambiental.