A plataforma de afectados polas participaciones preferentes y subordinadas do Val Miñor estivo presente na protesta.
A información foi recollida hoxe polos compañeiros de Praza Pública.
Até a mesma porta da casa de Núñez Feijoo. A protesta dos milleiros de afectados polas preferentes, despois de meses de mobilizacións, chegou este sábado até Montepío, sede da residencia oficial do presidente da Xunta, ao que acusan de ser "cómplice" da estafa. As plataformas de afectados de afectados da Coruña, do Baixo Miño, do Morrazo, de Bergantiños, de Ferrolterra, da Costa da Morte, de Monforte..., de toda Galicia, desprazáronse nesta ocasión até Compostela no comezo dun mes que pode ser crucial para o desenlace deste conflito.
A manifestación partiu da Alameda baixo unha chuvia que a acompañou de forma interminente durante todo o percorrido pola zona vella de Compostela. Na marcha participaron moitos representantes das forzas da oposición, dende Sánchez Bugallo ou Méndez Romeu polo PSdeG-PSOE, Juan Fajardo, Antón Sánchez ou Xabier Ron de AGE, ou Carlos Aymerich, Francisco Jorquera ou Carme Adán polo BNG.Escoitáronse os xa habituais berros de "non hai pan para tanto chourizo" ou "politicos e banqueiros, todos ao caldeiro" e as acusación de "ladróns" cada vez que a marcha pasaba por unha oficina de NGB. Pero nesta ocasión máis ca nunca as críticas tiñan como destinatario o Partido Popular.
O manifesto foi lido por Pilar Domínguez, unha muller de 85 anos de Compostela que perdeu os seus aforros. Na lectura, dura e emotiva, pediulle a Núñez Feijoo que se puxese do seu lado: "enchíaselle a boca despois das eleccións dicindo que ía ser o presindente de todos os galegos. Como vai ser o noso presidente cando está máis preocupado por quedar ben diante dos seus xefes en Madrid que por arranxar este latrocinio escandaloso? Señor Feijoo: vostede sabía que se estaba roubando e non fixo nada". E concluíu: "Non nos chegaba con ser estafados polos bancos que agora nons chega o espolio por parte do Goberno. E que non lle boten a culpa a Bruxelas: a competencia para resolver isto é do Banco de España e da CNMV".
Os afectados denuncian que os populares "fixeron a campaña a conta nosa. Prometéronnos a devolución dos cartos a todos os afectados e afectadas", denuncian que isto constitúe "unha burla aos cidadáns" e conclúen que "din que están aí porque os cidadáns os votaron pero a verdade é que están aí porque nos enganaron". Criticaron con dureza a Feijoo e tamén a Montoro, De Guindos, Rajoy ou Gallardón pero levaron tamén a súa denuncia até o nivel máis local da politica: "aquí hai responsables. Responsable é o señor Feijoo pero é tamén responsable todo aquel que represente o Partido Popular e temos que ir a buscalos a casa se fai falla".
Na súa denuncia esixenlles aos alcaldes e concelleiros do Partido Popular nas súas localidades que escollan entre defender os veciños e defender o Partido Popular: "o PP quérenos roubar e non se pode estar a dúas bandas. Os alcaldes e concelleiros do PP deben presentar a súa dimisión. E se non nós temos que obrigalos".
