O desafío deportivo que inaugurara o Campo de Fútbol As Gaiandas en 1946 volverá a repetirse na disputa da VII edición do Trofeo Vila de Gondomar. O local, Gondomar.C.F. -organizador do trofeo- recibirá ao Rápidos de Bouzas, da Terceira División Nacional nun encontro que terá lugar este domingo 3 de agosto ás 19 horas nas Gaiandas.

O Club Ciclista Rías Baixas viviu unha xornada histórica ao conseguir a súa primeira vitoria nunha proba Élite-Sub23 na súa segunda tempada nesta categoría. O triunfo chegou no calendario portugués e asinouno Jacobo Ucha. O corredor porriñés impúxose no Circuíto Festas de Lousada organizado pola Asociación Ciclista de Oporto. O representante da entidade do Val Miñor alcanzou en solitario a liña de meta logo de ser o gran protagonista desta clásica practicamente desde o bandeirazo inicial. Ucha filtrouse na fuga que se formou na quinta das 30 voltas que os participantes tiñan que completar a un circuíto de case tres quilómetros.

-Andrés Torres, da A.D. Vincios, subcampión de dobres alevíns no Campionato de España de tenis de mesa celebrado en Antequera
-Un total de 13 deportistas representaron á Agrupación na competición máis importante do calendario estatal
A cidade de Antequera (Málaga) acolleu, recentemente, os campionatos de España de tenis de mesa de todas as categorías desde benxamín ata absoluto, nos que participaron máis de 2000 xogadores e xogadoras de todos os clubs existentes a nivel do Estado.

O torneo tivo na categoría masculina unha disputada final entre Carlos Becke e Manuel Santome. Becke acadou o trofeo tras gañar os dous sets por 7/6 e 6/2. Aínda máis dura foi a finalísima feminina onde a gañadora Sofía Bancoff (alumna do Tenis Gondomar) tivo que dobregar a Raquel Arreola en 3 encontros: 7/6, 4/6 e 6/3. Tras finalizar a competencia o Club Tenis Gondomar procedeu á entrega de trofeos e o sorteo dun cheque para dous circuítos termais nas Termas de Outariz que finalmente obtivo Yago González.

O ciclista baionés Adrián Valverde completou onte no circuíto de Panticosa (Huesca) as seis voltas da carreira Rally Sub 23 do Campionato de España de mountain bike e cruzou a liña de meta no posto 25. O corredor do Club Ciclista Rías Baixas foi un dos tres representantes galegos na proba que se adxudicou o biker ourensano Pablo Rodríguez Guede.

O Club Baloncesto Nigrán reinicia a súa actividade deportiva neste municipio logo de máis dunha década de inactividade deportiva. Este rexurdimento da entidade débese á iniciativa dun grupo de pais e nais , con Pablo Vilas como presidente, xunto a Nuria Gómez Domínguez, adestradora superior de baloncesto quen asumirá como directora deportiva do club. Tamén contarán co traballo do adestrador da INEF, Marco Fernández Riesco. A nova directiva salienta que tomarán "as rendas deste club co fin de seguir traballando, do mesmo xeito que fixeron os seus fundadores en 1988".

O próximo Domingo día 20 de Xullo as 10.00 horas terá lugar no Paseo da Praia da Ribeira en Baiona (entrada ao Parador) o III Triatlón Popular,
organizado pola Concellería de deportes e actividades marítimas e pola Piscina mancomunada do Val Miñor, incluído dentro da programación deportiva deste verán 2014.
A proba consta de tres partes: a primeira, percorrido a nado de 0.5 km, a segunda parte, percorrido en bicicleta estática pedaleando 10 km e a terceira parte, correndo ao redor do Parador, cunha distancia de 4 km.

Un total de 44 nenos e nenas, de idades comprendidas entre os 4 e 15 anos, participaron durante o mes de xuño no Campus de Verán de Patinaxe, organizada polo Club de Patinaxe Artística Gondomar coa colaboración do Concello. As clases, de 45 minutos dous días á semana e en horario de tarde, "serviron para que os nenos e nenas aprendesen as principais técnicas, saltos e figuras", explica David Figueroa, adestrador do Club Patinaxe Gondomar. O Campus de Patinaxe continúa durante este mes de xullo, nesta ocasión en horario de mañá, de 10.00 a 11.30 horas.