O equipo Élite e Sub 23 do Club Ciclista Rías Baixas disputa desde mañá, venres día 22, ata o domingo no norte de Portugal a Volta ao Alto Tâmega, unha cita na que compartirá pelotón cos conxuntos profesionais máis fortes do ciclismo luso. A estrutura que dirixe Marcos Serrano acode á primeira edición desta carreira con Aser Estévez e Jose Manuel Gutiérrez como xefes de filas.

Os dous corredores máis fortes desta formación chegan nun bo momento de forma. O guardés logrou a pasada semana o maillot azul de mellor galego na clasificación final da Volta á Provincia da Coruña. Debido a este éxito, foi recibido nas últimas horas no concello de Baiona polo alcalde desta localidade, Jesús Vázquez Almuiña. O rexedor local felicitou a Aser por este brillante resultado e desexoulle sorte para sumar máis triunfos durante esta tempada defendendo as cores do equipo que representa ao Val Miñor nesta categoría.
Pola súa banda, o cántabro Gutiérrez terminou sétimo na xeral da volta coruñesa e confía en seguir demostrando a súa calidade no país veciño. Alejandro Santos, Samuel Rodríguez, Anxo Lorenzo, Xoel Dias, David Pérez e Cristian Mota completan a formación que presenta Serrano.
A Volta ao Alto Tâmega arrinca na primeira xornada cunha contrarreloxo por equipos de cinco quilómetros en Chaves. O sábado celebrarase a etapa máis esixente, de 197 kms de percorrido entre Boticas e o Alto dá Serra do Larouco. Para o domingo está programado un dobre sector: pola mañá 75 kms entre Valpaços e Ribeira dá Pena, e pola tarde 58 kms nun circuíto urbano en Vila Pouca de Aguiar.
Entre os 16 equipos participantes destacan as estruturas portuguesas do Efapel, Tavira, A Antarte, W52-Quinta da Lixa (cos galegos Gustavo César Veloso e Delio Fernández) e o conxunto ruso do Lokosphinx.