O libro ten unha compoñente moi entrañable, pois recolle os traballos, feitos con dedicación e cariño, dun grupo de persoas adultas que se decidiron mellorar a súa capacidade para a creación de textos literarios da man da poeta Marta Dacosta e expoñen nel a súa obra chea de sensibilidade que acada en moitos casos cotas de calidade propias de escritores con maior dedicación. Titúlase Desenvolvendo o nobelo, título que fai mención a unha imaxe creada por Marta Dacosta:
Escribir é...
atopar a punta do fío axeitado e tirar del até desfacer o nobelo.
Despregar diante de nós esa sucesión de palabras que constrúe o edificio do texto e abriga as ideas.Â
Ao mesmo tempo, con este título o Instituto de Estudos Miñoranos bota andar un novo espazo editorial, ao coidado de Miguel Anxo Mouriño, destinado a compartir cos lectores un catálogo de libros dixitais de calidade e interese. Perséguese con esta iniciativa dous obxectivos. Por unha banda pór a disposición escritos que, posiblemente, non se atoparían noutras canles. Pola outra, proporcionarlles a escritores (noveles ou non) a oportunidade de dar a coñecer a súa obra e sometela á consideración dos lectores .
Codificado nas versións máis universais para lectores dixitais, Desenvolvendo o nobelo está dispoñible en formato pdf, mobi e epub. Sendo posible a súa descarga, neste caso gratuíta, directamente da web oficial do IEM (http://www.minhor.org), como na plataforma Google Play.
