O Centro Cultural de Peitieiros celebra esta ano un entroido moi especial.
A cita será este sábado ás 17h no Regueiro, Os Amados na parroquia de Peitieiros en Gondomar.
Este ano, ademais dos certames de sobremesas e disfraces que se veñen desenvolvendo tradicionalmente, a Directiva do Centro Cultural introduce unha nova figura con vocación de permanencia e co obxectivo de animar o Entroido de Peitieiros e Gondomar: o Tourón ou Teixugo.
Baixada do Tourón da Paraguda
O teixugo é un animal omnívoro que vive no monte e ás veces se alimenta de cultivos, motivo polo que pode chegar estragalos. En Peitieiros recibe o nome de tourón (na toponimia temos rexistrada esta forma no regato de Touróns que é un afluente do río Rasas). Existen rexistros fotográficos de captura do animal posibelmente no monte da Paraguda, o pico máis alto do monte Matalagartos que está sobre a parroquia de Peitieiros. Ao redor deste feito a Directiva do Centro Cultural propón unha festa na que non faltarán as coplas e que percorrerá a parroquia nesta tarde de sábado de Entroido.
A festa continuará ás 19 horas no adro de Peitieiros, primeiro co Tourón no propio adro, e logo no Centro Cultural onde haberá certame de sobremesas, certame de disfraces, música, maquillaxe, etc.
