Cantares do Brión estreará novas pezas e estandarte no Concerto das Letras Galegas en Vincios.

Imprimir
coro-tradicional-canteres-b

No día en que se cumpren 150 anos da publicación de Cantares gallegos, de Rosalía de Castro, o Coro Tradicional Cantares do Brión estreará Has de cantar, poema que integra a devandita obra. A peza foi composta polo director do coro, Pablo Rial Salgueiro, con motivo deste aniversario. A composición, musicada a partir das primeiras estrofas do poemario, formará parte do programa do Concerto das Letras Galegas, que homenaxea ao dramaturgo Roberto Vidal Bolaño, a celebrarse este sábado 18 de maio no auditorio do Centro Cultural de Vincios (Gondomar), a partir das 21 horas.

 

Pero o coro tamén anuncia outras estreas como Xota da Ponte, con letra de Rosa Hervella e música do corista Antón Silva Tubío. O repertorio incluirá outras pezas de autores homenaxeados no Día das Letras Galegas, como Manuel María e Valentín Paz-Andrade.

Durante o acto terá lugar a presentación do novo estandarte do coro, deseñado por Pepe Barro e realizado no taller de Patri, en Saiáns (Vigo), coa colaboración na produción de Isaac Teniente. A entrada é de balde.