-A gaiteira actúa o sábado 11 de agosto na Praza da Alameda onde presentará o seu espectáculo "Escencias".

-Os Irmandiños de Vincios presentan o novo disco 'Monte Galiñeiro' no mesmo escenario

A gaiteira Susana Seivane, artista de referencia no panorama folk galego e de renome internacional, fai parada na súa xira estival no concello de Gondomar o sábado 11 de agosto para presentar o espectáculo 'Esencias', no que debulla sobre o escenario temas fundamentais do seu repertorio. Posuidora dunha traxectoria imparable, que a ten levado polas mellores táboas tanto do territorio nacional como internacional, Susana Seivane actuará na Praza da Alameda dentro da programación de verán elaborada pola Concellería de Cultura do Concello de Gondomar.

Susana Seivane é a herdeira da familia Seivane, unha das familias con máis prestixio e sona dentro do mundo dos gaiteiros e artesáns de gaitas en Galicia. Comezou a súa andaina musical ó cumprir tres anos de idade. Da man do seu pai Álvaro Seivane e influenciada por mestres gaiteiros como o seu avó, Xosé Manuel Seivane, Ricardo Portela e Moxenas, conseguiu o respecto e admiración do mundo da gaita e da música tradicional en Galicia. Un estilo xenuíno e "enxebre" que está presente na forma de tocar de Susana. Mais ela tamén é quen de crear un estilo propio, abrindo este legado a influencias doutras músicas.

Os Irmandiño presentan novo disco

Esa mesma noite, antes de que suba ao escenario Susana Seivane, os Irmandiños de Vincios presentarán en directo os temas do seu novo traballo, Monte Galiñeiro, que contou coa colaboración do Concello de Gondomar para a súa edición. O novo disco recolle 16 dos mellores temas cos que a banda vén rodando por toda a xeografía galega dende hai máis de sete anos, dos cales, nove son temas propios, un deles homenaxe ao gaiteiro Secundino de Chandebrito.